మాటలు రావు.. వినపడదు.. అయినా కష్టాన్ని నమ్ముకున్నాడు! బ్లింకిట్ డెలివరీ బాయ్ వీడియో వైరల్

సోషల్ మీడియాలో ఎప్పుడూ ఏదో ఒక వీడియో వైరల్ అవుతూనే ఉంటుంది. కానీ కొన్ని వీడియోలు మాత్రం మనసుకు హత్తుకోవడమే కాకుండా, జీవితంపై కొత్త స్ఫూర్తినిస్తాయి. తాజాగా హర్యానాలోని అంబాలాకు చెందిన ఓ బ్లింకిట్ (Blinkit) డెలివరీ బాయ్ వీడియో నెటిజన్ల హృదయాలను గెలుచుకుంటోంది. సదరు యువకుడు మాట్లాడలేడు, వినలేడు (Deaf and Dumb). కానీ ఆ వైకల్యాన్ని సాకుగా చూపించి ఇంట్లో కూర్చోలేదు. రద్దీగా ఉండే అంబాలా వీధుల్లో తన స్కూటర్‌పై తిరుగుతూ, సమయానికి కస్టమర్లకు సరుకులు అందిస్తూ సొంత కాళ్లపై నిలబడుతున్నాడు.

ట్రాఫిక్ రొదలో కూడా ఎంతో జాగ్రత్తగా డ్రైవ్ చేస్తూ తన విధిని నిర్వర్తిస్తున్నాడు. ఈ వీడియో చూసిన నెటిజన్లు 'మెన్ ఆర్ బ్రేవ్' (Men Are Brave) అంటూ కామెంట్స్ చేస్తున్నారు. దేశంలో 140 కోట్ల జనాభా ఉన్నా, చేయడానికి పనులు లేవని, ఉపాధి దొరకడం లేదని ఫిర్యాదు చేసే వారికి ఇతను ఒక గొప్ప ఉదాహరణ అని ప్రశంసిస్తున్నారు. గిగ్ ఎకానమీ (Gig Economy) వల్ల ఇలాంటి వారికి ఉపాధి దొరకడం సంతోషకరమని పేర్కొంటున్నారు. కష్టాలకు భయపడకుండా, మౌనంగా తన పని తాను చేసుకుపోతున్న ఈ యువకుడి పట్టుదల నిజంగా అభినందనీయం. ప్రస్తుతం ఈ వీడియో వేల లైకులతో దూసుకుపోతోంది.