Lionel Messi: కొత్త స్టేడియంలో మెస్సి సందడి.. ఏప్రిల్ 4న ఇంటర్ మియామి 'ఫ్రీడమ్ పార్క్' ప్రారంభం

Lionel Messi: సాకర్ మాంత్రికుడు లియోనెల్ మెస్సి అభిమానులకు శుభవార్త. మెస్సి ప్రాతినిధ్యం వహిస్తున్న 'ఇంటర్ మియామి' క్లబ్ తన సొంత మైదానాన్ని సిద్ధం చేసుకుంది. 2026 మేజర్ లీగ్ సాకర్ (MLS) సీజన్‌లో భాగంగా ఏప్రిల్ 4న కొత్తగా నిర్మించిన 'మియామి ఫ్రీడమ్ పార్క్' స్టేడియం ప్రారంభం కానుంది. ఆ రోజు ఆస్టిన్ ఎఫ్‌సీతో జరిగే మ్యాచ్‌తో మెస్సి తన కొత్త హోమ్ గ్రౌండ్‌లో అడుగుపెట్టనున్నారు.

గురువారం విడుదల చేసిన 2026 ఎంఎల్‌ఎస్ షెడ్యూల్ ప్రకారం.. ఫిబ్రవరి 21న లీగ్ ప్రారంభం అవుతుంది. మెక్సికో, కెనడా, అమెరికా వేదికగా జరిగే ఫిఫా ప్రపంచకప్ (మే 25 - జూలై 16) సమయంలో లీగ్‌కు విరామం ఉంటుంది.

హైలైట్స్: * ఫిబ్రవరి 21న జరిగే సీజన్ ఆరంభ మ్యాచ్‌లలో భాగంగా మెస్సికి చెందిన ఇంటర్ మియామి జట్టు, లాస్ ఏంజిల్స్ ఎఫ్‌సీతో తలపడనుంది. లాస్ ఏంజిల్స్ మెమోరియల్ కొలీజియంలో జరిగే ఈ మ్యాచ్‌లో మెస్సి.. కొరియన్ స్టార్ సన్ హ్యూంగ్-మిన్‌ను ఢీకొననుండటం విశేషం.

* ఇంటర్ మియామి కొత్త స్టేడియం సామర్థ్యం 25,000. * లీగ్ నవంబర్ 7న ముగుస్తుంది. ఆ తర్వాత ప్లేఆఫ్స్ జరుగుతాయి. * 2026 ప్రపంచకప్ ఫైనల్ జూలై 19న జరగనుండగా, దానికి సరిగ్గా మూడు రోజుల ముందే ఎంఎల్‌ఎస్ లీగ్ తిరిగి ప్రారంభమవుతుందని నిర్వాహకులు తెలిపారు.