తల్లీపాల‌ల్లో యురేనియం ఆనవాళ్లు... ఎయిమ్స్ తాజా అధ్యయనంలో వెల్లడి! పిల్లలకు పాలు ఇవ్వొచ్చా?

బీహార్‌లో జరిపిన ఒక తాజా వైద్య అధ్యయనం అందరినీ ఆశ్చర్యానికి గురిచేస్తోంది. పాట్నాలోని మహావీర్ క్యాన్సర్ సంస్థాన్ మరియు ఢిల్లీ ఎయిమ్స్ (AIIMS Delhi) సంయుక్తంగా నిర్వహించిన పరిశోధనలో బాలింతల పాలలో యురేనియం (Uranium) ఆనవాళ్లు ఉన్నట్లు గుర్తించారు.

అధ్యయన వివరాలు: ఎయిమ్స్ ఢిల్లీ అడిషనల్ ప్రొఫెసర్ డాక్టర్ అశోక్ శర్మ ఈ వివరాలను వెల్లడించారు. ఈ అధ్యయనంలో భాగంగా 40 మంది తల్లుల నుండి పాల నమూనాలను సేకరించి పరీక్షించగా, వాటన్నింటిలోనూ 'యురేనియం-238' ఉన్నట్లు తేలింది. అత్యధికంగా ఖగారియా జిల్లాలో పాల నమూనాల్లో లీటరుకు 5.25 మైక్రోగ్రాముల యురేనియం ఉన్నట్లు గుర్తించారు. అత్యల్పంగా నలంద జిల్లాలో లీటరుకు 2.35 మైక్రోగ్రాములు నమోదైంది.

ప్రమాదం ఉందా? పాలలో యురేనియం ఉండటం ఆందోళన కలిగించే విషయమే అయినప్పటికీ, భయపడాల్సిన అవసరం లేదని డాక్టర్లు చెబుతున్నారు. ప్రపంచ ఆరోగ్య సంస్థ (WHO) ప్రమాణాల ప్రకారం లీటరుకు 30 మైక్రోగ్రాముల వరకు యురేనియం ఉన్నా ఫర్వాలేదు. ప్రస్తుతం గుర్తించిన స్థాయిలు ఈ పరిమితి కంటే చాలా తక్కువగా ఉన్నాయని, దీనివల్ల తల్లీబిడ్డల ఆరోగ్యంపై పెద్దగా ప్రభావం ఉండదని డాక్టర్ అశోక్ శర్మ స్పష్టం చేశారు.

తల్లిపాలు ఆపేయాలా?: వద్దు. యురేనియం బహిర్గతం వల్ల పిల్లల కిడ్నీలు, నాడీ వ్యవస్థ అభివృద్ధి, ఐక్యూ (IQ) పై ప్రభావం పడే అవకాశం ఉన్నప్పటికీ, ప్రస్తుత పరిస్థితుల్లో తల్లిపాలు ఇవ్వడం ఆపకూడదని నిపుణులు సూచిస్తున్నారు. తల్లి శరీరంలోకి చేరిన యురేనియం ఎక్కువగా మూత్రం ద్వారా బయటకు వెళ్లిపోతుందని, పాలలో తక్కువ మోతాదులో మాత్రమే కలుస్తుందని తెలిపారు. వైద్యపరమైన ఇతర కారణాలు ఉంటే తప్ప, తల్లిపాలు ఇవ్వడం కొనసాగించాలని ఎయిమ్స్ నిపుణులు సిఫార్సు చేస్తున్నారు.