‘లేడీస్‌ అండ్‌ లేడీస్‌’.. ఐదుగురు హీరోయిన్స్‌తో యశ్‌ పోరు

కన్నడ స్టార్‌ హీరో యష్‌.. ‘కేజీఎఫ్‌’ సిరీస్‌తో పాన్‌ ఇండియా స్టార్‌గా అవతరించిన విషయం తెలిసిందే. ఆయన తదుపరి చిత్రం కోసం అభిమానులు ఆసక్తిగా ఎదురుచూస్తున్నారు. ఈ నేపథ్యంలో యష్‌ కథానాయకుడిగా, ప్రముఖ దర్శకురాలు గీతూ మోహన్‌దాస్‌ దర్శకత్వంలో ఓ భారీ బడ్జెట్‌ చిత్రం తెరకెక్కుతోంది. ఈ సినిమాకు ‘టాక్సిక్‌’ అనే టైటిల్‌ ఖరారు చేశారు. ఇందులో యష్‌ సరికొత్త అవతార్‌లో కనిపించనున్నారని మొదటినుండి వార్తలు వస్తున్నాయి. ఇక ఈ సినిమాలో యష్‌కు జోడీగా ఏకంగా ఐదుగురు అగ్రతారలు నటిస్తున్నట్లు చిత్రబృందం ఇదివరకే ప్రకటించింది. ఈ వార్త అభిమానుల్లో మరింత ఉత్సాహాన్ని నింపింది.

తాజాగా ‘టాక్సిక్‌’ చిత్రబృందం ఓ అద్భుతమైన వీడియోను విడుదల చేసి, ప్రేక్షకులను సర్ప్రైజ్‌ చేసింది. ‘లేడీస్‌ అండ్‌ లేడీస్‌’ పేరుతో విడుదలైన ఈ ప్రత్యేక వీడియో ద్వారా సినిమాలో నటించనున్న ఐదుగురు హీరోయిన్ల పాత్రల స్వభావాన్ని, వారి తీరును పరిచయం చేసింది. ఈ వీడియో ‘టాక్సిక్‌’ ప్రపంచాన్ని సైతం ప్రేక్షకుల కళ్లకు కట్టింది. యష్‌ హై-ఇంపాక్ట్ యాక్షన్ అవతార్‌లో మాస్ లుక్‌లో కనిపించి అభిమానులను అలరించగా, ఆయన సరసన నటించనున్న అందాల భామలు మునుపెన్నడూ చూడని పవర్‌ఫుల్‌, గ్లామరస్‌ పాత్రల్లో అదరగొట్టనున్నారని ఈ వీడియో స్పష్టం చేసింది.

ఈ వీడియోలో చూపిన దృశ్యాలు, పాత్రల పరిచయం సినిమాపై అంచనాలను అమాంతం పెంచేశాయి. గీతూ మోహన్‌దాస్‌ టేకింగ్‌, యష్‌ ఎంపిక చేసుకున్న ఈ విభిన్న కథాంశం ‘టాక్సిక్‌’ను మరో బ్లాక్‌బస్టర్‌గా నిలపడం ఖాయమని సినీ విశ్లేషకులు అభిప్రాయపడుతున్నారు. యాక్షన్, డ్రామా, థ్రిల్లింగ్ అంశాల కలయికతో రూపొందుతోన్న ఈ చిత్రం 2025లో ప్రేక్షకుల ముందుకు రానుంది. ‘టాక్సిక్‌’ ఒక పవర్‌ఫుల్‌ యాక్షన్ డ్రామాగా తెలుగు, కన్నడతో పాటు పలు భాషల్లో విడుదల కానుంది. ఈ సినిమా మరిన్ని రికార్డులను సృష్టించడం ఖాయంగా కనిపిస్తోంది.