AI మీ ఉద్యోగాన్ని లాక్కోదు.. కానీ ఏఐ వాడకం తెలిసిన మనిషి మీ పనిని లాగేసుకుంటాడు: నితిన్ మిట్టల్

ప్రపంచవ్యాప్తంగా కృత్రిమ మేధ (AI) వినియోగం పెరుగుతున్న తరుణంలో, ఉద్యోగ భద్రతపై నెలకొన్న ఆందోళనలపై డెలాయిట్ (Deloitte) గ్లోబల్ ఏఐ లీడర్ నితిన్ మిట్టల్ స్పష్టత ఇచ్చారు. ఢిల్లీలో జరిగిన ఎన్‌డిటివి వరల్డ్ సమ్మిట్‌లో పాల్గొన్న ఆయన, ఏఐ వల్ల కలిగే మార్పులు, భారతీయ ఐటీ రంగం భవిష్యత్తుపై ఆసక్తికర వ్యాఖ్యలు చేశారు. ఉద్యోగాలు పోతాయా? ఏఐ వల్ల ఉద్యోగాలు పోతాయన్న ప్రచారాన్ని నితిన్ మిట్టల్ ఖండించారు. "నేనింతవరకు ఏఐ వల్ల ఒక్క ఉద్యోగం పోవడం కూడా చూడలేదు. కానీ, ఏఐని సమర్థవంతంగా వాడటం తెలిసిన మరో వ్యక్తి వల్ల.. ఏఐ రాని వ్యక్తి ఉద్యోగం ప్రమాదంలో పడుతుంది," అని ఆయన స్పష్టం చేశారు. అంటే ఏఐ మన ఉద్యోగాన్ని నేరుగా తీసుకోదు, కానీ ఏఐ టూల్స్ వాడటంలో నైపుణ్యం ఉన్నవారు మనల్ని రీప్లేస్ చేసే అవకాశం ఉందని హెచ్చరించారు. కోడింగ్ వంటి రంగాల్లో ఇది ఇప్పటికే జరుగుతోందని, 'వైప్ కోడింగ్' (Wipe Coding) వంటి నైపుణ్యాలు నేర్చుకోవడం ముఖ్యమని సూచించారు. ఏఐలో మూడు ప్రధాన రకాలు: ప్రస్తుత ఏఐ యుగాన్ని ఆయన మూడు అంశాలుగా విభజించారు: 1. ఏజెటిక్ ఏఐ (Agentic AI): ఇది కేవలం ప్రోగ్రామ్ మాత్రమే కాదు, మనుషుల్లా ఆలోచించి, నిర్ణయాలు తీసుకుని, స్వయంగా పనులను పూర్తి చేసే సామర్థ్యం గల ఏఐ. 2. సావరీన్ ఏఐ (Sovereign AI): ప్రతి దేశం తనకంటూ సొంత ఏఐ వ్యవస్థను (చిప్స్, డేటా సెంటర్స్, మోడల్స్) కలిగి ఉండటం. భారత్ వంటి భిన్న సంస్కృతులు, భాషలు ఉన్న దేశానికి ఇది చాలా అవసరం. పాశ్చాత్య మోడల్స్ మన భాషలను, సంస్కృతిని పూర్తిగా అర్థం చేసుకోలేకపోవచ్చు. 3. ఫిజికల్ ఏఐ (Physical AI): కేవలం కంప్యూటర్లకే పరిమితం కాకుండా, రోబోలు, డ్రోన్లు, స్వయంప్రతిపత్తి కలిగిన వాహనాల రూపంలో భౌతిక ప్రపంచంలోకి ఏఐ రావడం. భారత్‌కు సువర్ణావకాశం: భారత్ కేవలం ఇతర దేశాలకు బ్యాక్ ఆఫీసులా మిగిలిపోకూడదని నితిన్ అభిప్రాయపడ్డారు. "మేక్ ఇన్ ఇండియా, డిజైన్ ఇన్ ఇండియా" తరహాలోనే ఏఐ ఉత్పత్తులను భారత్‌లోనే తయారు చేసి, ఇక్కడే పరీక్షించాలని ఆయన అన్నారు. ఉదాహరణకు, అమెరికాలో నడిచే డ్రైవర్‌లెస్ కార్లు (Waymo వంటివి) భారతీయ రోడ్లపై వెంటనే నడవలేవని, మన పరిస్థితులకు తగ్గట్టుగా ఇక్కడే స్మార్ట్ కారిడార్లను ఏర్పాటు చేసి టెక్నాలజీని అభివృద్ధి చేయాలని సూచించారు. కొత్త ఏఐ ఎకానమీ: ఏఐ వల్ల పాత ఉద్యోగాలు పోయినా, కొత్త రకం ఉద్యోగాలు పుట్టుకొస్తాయని నితిన్ మిట్టల్ ఆశాభావం వ్యక్తం చేశారు. ఏఐ డేటా సెంటర్ల నిర్మాణం, చిప్ తయారీ, ఎనర్జీ మేనేజ్మెంట్, బయోటెక్నాలజీ వంటి రంగాల్లో కోట్లాది కొత్త ఉద్యోగాలు వస్తాయని ఆయన విశ్లేషించారు. చివరగా, కంపెనీలు ఇక ప్రయోగాలు ఆపి, ఏఐని పూర్తిస్థాయిలో వినియోగించుకోవడంలో (All-in on AI) నిమగ్నం కావాలని, అదే సమయంలో సరైన గవర్నెన్స్ (నియంత్రణ) పాటించాలని ఆయన పిలుపునిచ్చారు.